Ministri i Jashtëm i Danimarkës, Lars Løkke Rasmussen, ka thirrur diplomatin më të lartë në ambasadën amerikane në Kopenhagë pas raportimeve se qytetarët amerikanë kanë kryer operacione ndikimi në Grenlandë, raportoi të mërkurën transmetuesi publik DR, duke cituar ministrin.
Presidenti i SHBA-së, Donald Trump, ka deklaruar më parë se dëshiron që Shtetet e Bashkuara të marrin përsipër ishullin Arktik, të pasur me minerale dhe strategjik për sigurinë kombëtare dhe ndërkombëtare, dhe nuk e ka përjashtuar përdorimin e forcës për ta realizuar këtë, raporton Reuters.
Qeveria daneze beson se të paktën tre qytetarë amerikanë me lidhje me administratën Trump kanë qenë të përfshirë në operacione të fshehta ndikimi në territorin danez, raportoi DR, duke cituar burime të paidentifikuara. Transmetuesi nuk i emëroi individët.
“Çdo përpjekje për të ndërhyrë në punët e brendshme të mbretërisë sigurisht që do të jetë e papranueshme,” citohet t’i ketë thënë DR-së ministri Rasmussen.
“Në këtë dritë, i kam kërkuar ministrisë së punëve të Jashtme të thërrasë të ngarkuarin me punë amerikan (diplomatin) për një bisedë,” ka shtuar ai.
Misioni amerikan në Kopenhagë aktualisht drejtohet nga i Ngarkuari me Punë Mark Stroh, sipas faqes së saj zyrtare të internetit.
Sinjali – aty ku e vërteta flet para lajmit!