Kryeministrja daneze, Mette Frederiksen, ka njoftuar të martën se Danimarka do të ndalojë përdorimin e mediave sociale për fëmijët nën 15 vjeç. Ajo theksoi se telefonat celularë dhe rrjetet sociale po “vjedhin fëmijërinë e të miturve”.
Frederiksen prezantoi këtë propozim në parlamentin danez, duke shprehur shqetësimin për rritjen e rasteve të ankthit dhe depresionit te fëmijët. Sipas saj, rrjetet sociale janë një “përbindësh” që është lënë të veprojë lirshëm.
Ajo nuk specifikoi se cilat platforma do të preken nga ndalimi, por bëri të ditur se disa rrjete sociale do të jenë të përfshira. Frederiksen shtoi se prindërit do të kenë mundësinë t’u japin leje fëmijëve të tyre për të përdorur mediat sociale nga mosha 13 vjeç.
Ndalimi pritet të hyjë në fuqi vitin e ardhshëm. Ky vendim ndjek shembullin e Australisë, e cila ka vendosur një kufizim moshe për përdoruesit nën 16 vjeç në platforma si Facebook, Snapchat, TikTok dhe YouTube. Po ashtu, Norvegjia ka njoftuar se do të rrisë kufirin minimal të moshës për mediat sociale nga 13 në 15 vjeç.
Sinjali – aty ku e vërteta flet para lajmit!