Andriy Parubiy, ish-kryetari i Parlamentit të Ukrainës, u qëllua për vdekje në qytetin perëndimor të Lvivit këtë pasdite. Zyra e prokurorit të përgjithshëm njoftoi se një person i armatosur e qëlloi disa herë drejt tij, duke e lënë të vdekur në vend.
Sulmuesi ka ikur nga vendi i ngjarjes dhe autoritetet kanë nisur kërkimin për arrestimin e tij.
Kryetari i bashkisë së Lvivit, Andriy Sadovyi, e cilësoi vrasjen si një çështje sigurie në një vend që po lufton me invazionin rus, raporton Skynews.
Ai theksoi se nuk ka asnjë vend të sigurt në Ukrainë në këtë periudhë lufte. Megjithatë, zyrtarët nuk dhanë detaje nëse vrasja kishte lidhje të drejtpërdrejtë me luftën e vazhdueshme në Ukrainë.
Kush ishte Andriy Parubiy?
Andriy Parubiy, 54 vjeç, ishte një figurë kyçe gjatë protestave të vitit 2013-2014 që kërkonin lidhje më të ngushta me Bashkimin Evropian. Ai ishte një nga udhëheqësit e protestës Euromaidan që rrëzoi ish-presidentin pro-rus, Viktor Janukoviq. Parubiy shërbeu si sekretar i Këshillit të Sigurisë dhe Mbrojtjes Kombëtare të Ukrainës në periudhën kritike nga shkurti deri në gusht 2014, kur Rusia aneksoi Krimenë dhe shpërthyen luftimet në lindje të Ukrainës. Ai gjithashtu ka shërbyer si kryetar i parlamentit të Ukrainës nga prilli 2016 deri në gusht 2019.
Sinjali – aty ku e vërteta flet para lajmit!