Izraeli ka zhvilluar një “operacion mashtrimi” për disa ditë me radhë para sulmeve të mëdha ajrore ndaj objektivave strategjike në Iran, me qëllim për të krijuar përshtypjen se një ofensivë nuk ishte në plan, raportoi CNN duke cituar një zyrtar izraelit, shkruan Gazeta Sinjali.
Sipas burimit, ky operacion përfshiu manipulimin e diskursit publik nëpërmjet mediave dhe komentatorëve politikë, me qëllim që udhëheqësit në Teheran dhe opinioni publik iranian të zbuteshin dhe të mos prisnin një ndërhyrje. “Mashtrimi funksionoi. Befasia ndaj Iranit u arrit”, tha zyrtari.
Plani ishte i rezervuar për një numër shumë të kufizuar partnerësh, ndërsa zyra e kryeministrit Benjamin Netanyahu luajti një rol kyç në shpërndarjen e deklaratave për të ndikuar perceptimin e situatës.
Megjithatë, inteligjenca amerikane kishte sinjalizuar mundësinë e një sulmi dhe mediat në SHBA nisën raportimet të enjten, pas komenteve të ish-presidentit Donald Trump dhe vendimit të Departamentit të Shtetit për të zhvendosur një pjesë të stafit nga ambasadat në rajon.
Në anën tjetër, zëdhënësi i Forcave të Armatosura të Iranit, gjeneral brigade Abolfazl Shekarchi, paralajmëroi një përgjigje të ashpër ndaj Izraelit dhe gjithashtu hodhi akuza ndaj SHBA-së.
“Republika Islamike përfundimisht do të hakmerret dhe armiku do të paguajë një çmim të lartë,” tha ai, duke shtuar se nga sulmet janë goditur edhe zona banimi dhe se ushtria iraniane është në gatishmëri të plotë.
Sinjali – aty ku e vërteta flet para lajmit!
