Nga rikthimi i shtëpive të mëdha si Burberry dhe Fendi, deri te lëvizjet vizionare të emrave të rinj, ja kush po përcakton drejtimin e modës bashkëkohore
Nëse ju pëlqen ta shihni modën përmes shifrave, analizave digjitale dhe ndikimit real në skenë, atëherë me siguri keni ndjekur raportet e Tagwalk. Në raportin e fundit, veçanërisht bien në sy temat e serisë verore që kjo platformë digjitale, e specializuar në gjurmimin e pistave dhe brendeve që ka publikuar.
Kjo pasqyrë sjell emrat dhe shtëpitë e modës që sot formësojnë industrinë: nga talentet e reja në ngjitje, deri te markat e mëdha që po përjetojnë rikthim të fuqishëm.
Analiza tregon qartë se moda sot po drejtohet njëkohësisht nga vizionarët e rinj dhe nga shtëpitë tradicionale që po ringjallin trashëgiminë e tyre historike, transmeton Telegrafi.
Willy Chavarría
Dizajneri i parë në kategorinë “marka në ngritje” është Willy Chavarría, krijues nga Nju Jorku, i cili shkon përtej estetikës dhe e shndërron modën në mjet të komentit shoqëror. Koleksionet e tij dallohen për prerje shumë të gjera, ngjyra të zbutura, rrobaqepësi të theksuar dhe një narrativë emocionale, shpesh të rrënjosur në kulturën latino dhe queer. Sipas Tagwalk, interesi për punën e tij është rritur jashtëzakonisht, falë pranisë së shtuar në pasarela dhe reagimeve pozitive të komunitetit të modës. Vetëm në këtë platformë, interesimi për markën e tij është rritur me 994% nga koleksionet pranverë/verë 2024 deri në pranverë/verë 2026.
Duran Lantink
Një tjetër emër në ngritje është Duran Lantink, i njohur për siluetat eksperimentale, përkushtimin ndaj qëndrueshmërisë dhe ironinë e hollë. Ai shquhet për shkrirjen e materialeve të mbetura nga prodhimet (stoqe të papërdorura) me modën luksoze, duke krijuar veshje që shpesh duken si objekte arti. Lantink është fitues i Çmimit Special të Jurisë Karl Lagerfeld dhe konsiderohet një nga zërat më të rëndësishëm të brezit të ri të vizionarëve të modës. Ky sukses e çoi edhe në postin e drejtorit kreativ të shtëpisë Jean Paul Gaultier.
- Markat që po kthehen fuqishëm
Burberry
Në kategorinë “marka që po rikthehen”, shembulli i parë është Burberry. Nën drejtimin kreativ të Daniel Lee, kjo shtëpi po i rikthehet rrënjëve britanike duke ripërpunuar siluetat klasike, modelin e famshëm me katrorë dhe frymëzimin ushtarak, të gjitha të interpretuara në një estetikë bashkëkohore. Sipas Tagwalk, interesimi për koleksionin vjeshtë/dimër 2025 është rritur me 179% krahasuar me koleksionin pranverë/verë 2024.
Fendi
Një tjetër rikthim të fuqishëm po e përjeton Fendi. Silvia Venturini Fendi vazhdon të udhëheqë linjat e modës për meshkuj dhe fëmijë, si edhe aksesorët, ndërkohë që jubileu i 100-vjetorit i dha brendit një shtysë të re. Ky përvjetor vuri në pah kodet që shtëpia i ka ruajtur me besnikëri: elegancën femërore, linjat e pastra dhe tonet e buta neutrale. Revytë e Fendit janë sërish në qendër të vëmendjes në diskursin e modës, ndërsa estetika e markës shihet gjithnjë e më shpesh në rrugë dhe në editoriale.
/Telegrafi/