Supozohej që të ishte çerdhe për fëmijët e fshatit Zajm në Klinë, por krejt çka shihet në të janë mbetjet e ndërtimit, qen endacakë dhe ngjason me një objekt të braktisur i cili ditë pas dite po kthehet në një shportë masive mbeturinash.
Çerdhja e dytë publike në këtë fshat të komunës së Klinës, ndonëse ka filluar ndërtimin në 2019-ën, për finalizimin e saj nuk dihet asgjë, raporton KIKS Kosova.
Nga jashtë duket bukur dhe afër përfundimit, mirëpo brenda saj gjithçka është në gjysmë.
Mbetje të ndërtimit, qen endacakë, mbeturina të tjera janë ato që bien në sy më shumë brenda objektit të kësaj çerdheje.
Ndonëse objekti duket që ka hapësirë goxha të madhe, në disa pjesë kanë mbetur vetëm blloqe dhe kulmi i pambuluar.
Tom Marku, banor i kësaj ane, tregon se si kjo hapësirë ka qenë cak edhe i vërshimeve.
Përfundimi dhe inaugurimi i kësaj çerdheje, sipas Markut do i ndihmonte shumë klinasit.
Kjo ngase sipas tij banorët e këtij qyteti po detyrohen që të dërgojnë fëmijët e tyre nëpër kopshte private ku padyshim se çmimi është shumë më i lartë se sa në atë publike.
Tutje, Marku tregon dhe se si këtij objekti i janë thyer edhe dritaret dhe shpeshherë është edhe strehë e qenve endacakë.
Sipas tij, ky kopsht i fëmijëve më shumë po dëmtohet se sa po ndërtohet.
Duke qenë se ky projekti i 2019-ës nuk mbërriti as të inaugurohet nga Ministria e Arsimit, premtimi i Nagavcit për edhe një çerdhe të re në Klinë, duket se ka mbetur vetëm brenda mureve të ministrisë, meqë për të nuk dinë shumë as drejtori i Arsimit, Qemajl Sejdija.
*Klikoni KËTU për t´u bërë pjesë e kanalit zyrtar të Klan Kosovës në Viber.
*Klikoni KËTU për ta shkarkuar aplikacionin e Klan Kosovës në Android, dhe KËTU për iOS.
<!–
–>
