Ambasadori i Mbretërisë së Bashkuar në Kosovë, Jonathan Hargreaves, dhe shefi i Zyrës së Bashkimit Evropian në Prishtinë, Aivo Orav, kanë zhvilluar të enjten takime me kryetarin e porsazgjedhur të Kuvendit të Kosovës, Dimal Basha, ku diskutuan zhvillimet politike dhe ngërçin lidhur me konstituimin e organit ligjvënës.
Ambasadori britanik e uroi Bashën për postin e tij dhe nënvizoi rëndësinë e konstituimit të plotë të Kuvendit sa më shpejt.
“U pajtuam mbi rëndësinë e konstituimit të plotë të Kuvendit sa më shpejt që të jetë e mundur, duke respektuar çdo vendim të Gjykatës Kushtetuese,” shkroi Hargreaves në Facebook, duke theksuar nevojën për përfshirje të komuniteteve të të gjitha grupeve etnike.
Basha, i cili shpalli njëanshëm të përfunduar seancën konstituive të Kuvendit të dielën, nuk arriti të zgjidhte nënkryetarin e pestë nga komuniteti serb, për çka pati kritika nga partitë e tjera parlamentare. Nga pesë nënkryetarët që kërkon Kushtetuta, katër u zgjodhën – tre shqiptarë dhe një përfaqësues i pakicave joserbe – ndërsa i pesti, nga komuniteti serb, nuk mori votat e nevojshme.
Kuvendi në njoftimin e tij për takimin me Hargreaves theksoi se kryetari e informoi ambasadorin “për zhvillimet e fundit politike në vend, me theks të veçantë për procesin e seancës konstituive të Kuvendit”.
Ndërkohë, Basha shkroi në Facebook:
“Diskutuam për zhvillimet e fundit politike në vend dhe për përfundimin e seancës konstituive të Kuvendit.”
Hargreaves shtoi se shpreson që ngërçi politik të zgjidhet shpejt, në mënyrë që Kuvendi dhe një qeveri e re të vazhdojnë punën jetike për të mirën e të gjithë qytetarëve të Kosovës.
Ai nënvizoi rëndësinë e konsultimit të mirëfilltë me komunitetin serb për të siguruar pjesëmarrjen e tyre të plotë në shoqërinë kosovare.
Ndërkaq, takimi i Bashës me shefin e BE-së në Kosovë, Aivo Orav, u fokusua te nevoja për respektimin e proceseve kushtetuese dhe krijimin e institucioneve gjithëpërfshirëse dhe shumetnike.
“Kryetari dhe përfaqësuesi i BE-së diskutuan lidhur me ngjarjet e fundit politike në Kosovë dhe biseduan për rëndësinë e një legjislature efektive për realizimin e politikave integruese në BE.”, thuhet në njoftimin e Kuvendit.
Orav shkroi në X: “BE-ja është këtu për të mbështetur Kosovën. Formimi i komiteteve qeveritare dhe parlamentare është kyç për avancimin e Planit të Rritjes. Bllokada politike pas zgjedhjeve të shkurtit po i kushton vendit miliona euro nga Plani i Rritjes i BE-së për Ballkanin Perëndimor.”
Sinjali – aty ku e vërteta flet para lajmit!