Dimal Basha, kryetari i ri i Kuvendit të Kosovës, që u zgjodh nën polemikat e mëdha dhe mes zhurmës nëse është kredibil për këtë përgjegjësi të lartë shtetërore, është përfshirë në një debat publik që sfidon logjikën dhe shkencën.
Një punim shkencor që po konsiderohet skandaloz, i botuar në vitin 2012, për bashkautor ka hiç më pak se Bashën, anëtar i LVV-së së Albin Kurtit i cili detyrën e kryeparlamentarit e mori më 26 gusht. Ky cilësim për shkrimin vjen pasi në të vihet në dilemë vetë shtetësia e Kosovës dhe lufta e UÇK-së, raporton Kiks Kosova.
Punimi shkencor që mban nënshkrimin e Jana Arsovkas, një autore me nënshtetësi maqedonase, dhe Dimal Bashës, thotë se, “Sipas rasteve të hetuara, fondet për UÇK-në vinin nga shqiptarë të zakonshëm në diasporë, si dhe nga trafikantë droge që vepronin në të gjithë Evropën Perëndimore dhe SHBA-në. Kjo mbështetje nuk kufizohej vetëm në para, por trafikantët e drogës dërgonin gjithashtu njerëz të armatosur për të luftuar përkrah UÇK-së dhe blinin armë në emër të UÇK-së”.
Ky shkrim që u botua më 2012, u bë i njohur për opinionin në vend vetëm tash pasi Vetëvendosja e beri Bashën njeriun e dytë më me ndikim në Kosovë, kryetar të Kuvendit.
Dimal Basha i njohur në publik si një ndër deputetët më kontrovers i cili përdor gjuhën e urrejtjes e fyerjet në paraqitjet e tij publike, tentoi të hiqte përgjegjësinë nga vetja në lidhje me shkrimin. Ai shkroi në Facebook: “Nga goja ime dhe nga duart e mia nuk është shkruar dhe nuk do të mund të gjendet asnjë përmbajtje që bie ndesh me këtë vlerë të shenjtë të popullit tonë”.
Në botën e shkencës, një tentim i tillë për distancim, është i papranueshëm.
Çdo bashkautor duhet të dijë, të miratojë dhe të mbajë përgjegjësi jo vetëm për pjesën që kontribuon por për gjithë atë ku nënshkruhet.
Nuk ka “pafajësi” të fshehur pas një firme, thonë standardet e ICMJE (International Committee of Medical Journal Editors), ato janë të qarta: nuk mund të pretendosh se nuk e di se çfarë firmos.
Nëse nuk e di, atëherë lind pyetja se si emri juaj figuron aty?
Shkenca thotë se nëse nuk e di e nuk ke njohuri të mjaftueshme për të qenë bashkautor, atëherë je plagjiator, por nëse e di, po përpiqesh të heqësh dorë nga përgjegjësia morale dhe intelektuale që të takon.
Sipas ICMJE, rolet në një punim shkencor janë të qarta:
Autori kryesor – koncepton studimin, mbledh dhe analizon të dhënat, shkruan draftin dhe përgjigjet për saktësinë e punimit.
Bashkëautorët – bëjnë kontribute intelektuale reale dhe miratojnë versionin final; nuk mund të pretendosh se nuk e di çfarë shkruhet.
Kontributues jo-autorë – ndihmojnë, por nuk kanë përgjegjësi për përmbajtjen.
Njohja e roleve nuk është formalitet: ajo ruan integritetin shkencor, siguron ndershmëri akademike dhe shmang abuzimet me autorësinë.
Çdo studiues që ndjek këto rregulla rrit kredibilitetin e punës së tij/saj.
Këshilli Etik i Botimeve – COPE, mbështet të njëjtën gjë, madje në mënyrë decidive thotë se Individët e listuar si autorë duhet ta shqyrtojnë dhe miratojnë dorëshkrimin përfundimtar para publikimit.
Parime të njëjta përdorën kudo në botën e shkencës, e edhe në Kosovë.
Sipas profesoreshës universitare Vjosa Sadriu Hamiti, autori e mban barrën e njëjtë si bashkautori, edhe nëse ke kontribuar vetëm në një pjesë të punimit. Ajo thotë se askush nuk mund të vendosë emrin tënd pa miratimin tënd, teksa thekson se kur e pranon publikimin, je përgjegjës për krejt çfarë shkruhet aty.
Profesoresha gjithashtu thekson se referencat e përdorura në punim janë të dyshimta dhe nuk përfshijnë asnjë burim të besueshëm për çështjen shqiptare.
Për këtë arsye, punimi është konsideruar skandaloz në qarqet akademike. Ajo thotë se artikulli minon historinë e UÇK-së dhe sakrificat e shqiptarëve.
Por pse ky punim i njeriut që e solli në skenën politike Albin Kurti, është një alarm për sigurinë dhe shtetësinë e Kosovës?
Sipas Sadriu Hamitit, Basha tashmë është ngjyrosur dhe mban postin e dytë më të lartë në vend, atë të kryekuvendarit, andaj rreziku i shtrembërimit të historisë së luftës së Kosovës është real dhe aktiv.
Ky punim që mban nënshkrimin e kryekuvendarit Basha, tashmë është cituar 4 herë nga punime të tjera shkencore dhe deri sa është aktiv, ai do të jetë në mbështetje të propagandës së Serbisë mbi luftën e UÇK-së.
Arsovska, profesoreshë në Kolegjin e Drejtësisë Penale “John Jay” dhe autore e artikullit të vitit 2012 “Globalizimi i Ballkanit Perëndimor: Krimi Ndërkombëtar, Islami Fundamental dhe Aleancat e Pahijshme”, e kishte falënderuar Dimal Bashën për kontributin e tij.
Ky falënderim gjendet në librin e saj, “Dekodimi i krimit të organizuar shqiptar”.
“Gjithashtu dua të falënderoj edhe asistentët kërkimorë dhe ish-studentët Michael Temple, Irini Gjoka, Adriana Michilli, Dimal Basha, Jeff Walden….”, thuhet në librin e Arsovskas.
Sidoqoftë, në rastin e Bashës, shkenca vë në pikëpyetje njohuritë, kredencialet dhe integritetin e tij.
Ritheksojmë se çdo bashkautor është përgjegjës për përmbajtjen që firmos.
Deklarata e Bashës për të hequr dorë nga përgjegjësia mbi artikullin që njollos Kosovën, diasporën shqiptare dhe UÇK-në, tregon qartë tensionin mes autorësisë dhe përgjegjësisë publike dhe ngre pikëpyetje serioze mbi kredibilitetin e tij.
Në botën akademike, politike, si dhe në sferën publike, përgjegjësia nuk mund të shmanget.
Dëmi është shkaktuar, por kush do ta paguajë! /Klankosova.tv
The post Biografia tjetër e kryeparlamentarit të Kurtit: Dimal Basha, i rrezikshëm për Kosovën? (VIDEO) appeared first on Klan Kosova.