Zëvendësshefi i Shtabit të Vladimir Putinit, Dmitry Kozak, ka paraqitur dorëheqjen e tij.
Kështu së paku raportojnë media të huaja, sipas të cilave, Kozak po shqyrton “oferta të ndryshme për të hyrë në biznes”.
Gazetari Alexey Venediktov dhe analisti politik Arkady Dubnov gjithashtu raportuan largimin e tij, duke cituar burimet e tyre, shkruajnë mediat e huaja, përcjell Telegrafi.
Kozak është një nga bashkëpunëtorët më të vjetër të presidentit Vladimir Putin.
Të dy punuan së bashku në zyrën e kryetarit të bashkisë së Shën Petersburgut në vitet 1990.
Që nga fillimi i viteve 2000, Kozak ka mbajtur një sërë postesh të larta si në kabinet ashtu edhe në Kremlin.
Nga viti 2008 deri në vitin 2020, ai shërbeu si zëvendëskryeministër, dhe në vitin 2020 u bë zëvendësshef i stafit të administratës presidenciale.
Në fillim të gushtit, The New York Times, duke cituar burime, raportoi se në vitin 2022, Kozak e këshilloi Putinin të mos pushtonte Ukrainën.
Ndërkohë në vitin 2025, ai thuhet se i kërkoi presidentit të fillonte bisedimet e paqes dhe të ndiqte reformat e brendshme, duke përfshirë vendosjen e shërbimeve të sigurisë së Rusisë nën kontrollin e qeverisë. /Telegrafi/