Kryetari i Kuvendit të Kosovës, Dimal Basha, priti pasditen e sotme në takim Shefin e Zyrës së Bashkimit Evropian në Kosovë, Aivo Orav, raporton Gazeta Sinjali.
Gjatë takimit, Basha dhe Orav diskutuan për ngjarjet e fundit politike në Kosovë dhe theksuan rëndësinë e një legjislature efektive për realizimin e politikave integruese në BE.
“Kryetari Basha e falënderoi përzemërsisht Ambsadorin e Bashkimit Evropian për mbështetjen e vazhdueshme dhe të madhe që Bashkimi Evropian i ka dhënë Kosovës në të gjitha fazat e shtetndërtimit, në fusha të ndryshme dhe me projekte të shumta ndër vite.”, thuhet në njoftim.
Basha gjithashtu theksoi rëndësinë e largimit të masave ndaj vendit tonë dhe praninë e Kosovës në Këshillin e Evropës, duke e konsideruar këtë si një mekanizëm shtesë që garanton avancimin e lirive dhe të drejtave të njeriut për të gjithë qytetarët.
Nga ana e tij, Orav e uroi Basha për detyrën e re si kryetar i Kuvendit dhe nënvizoi rëndësinë e funksionalizimit të institucioneve, duke shprehur gatishmërinë për vazhdimin e bashkëpunimit të ngushtë dhe mbështetjes së fuqishme të BE-së për Kosovën.
Sinjali – aty ku e vërteta flet para lajmit!