Kryeministri në detyrë i Kosovës, Albin Kurti, është pyetur lidhur me vendimin e Komisionit Qendror të Zgjedhjeve për të mos certifikuar kandidatët e Listës Serbe dhe reagimet e Ambasadës Amerikane dhe organizatave të shoqërisë civile ndaj zhvillimeve të fundit në KQZ me partinë më të madhe të serbëve në Kosovë, e cila kontrollohet nga Beogradi.
Ambasada amerikane pati reaguar ndaj votimit kundër të dy anëtarëve të LVV-së në KQZ për të mos certifikuar Listën Serbe për pjesëmarrje në zgjedhjet e 28 dhjetorit. Anëtarë tjerë patën abstenuar, dhe rrjedhimisht, kjo parti nuk ishte certifikuar. Për këtë vendim, LS-ja ishte ankuar në PZAP, i cili e kishte hedhur poshtë vendimin e KQZ-së, duke e detyruar të njëjtën që të certifikojë LS-në, raporton Klankosova.tv.
Ndërkaq, në reagimin e Ambasadës thuhej: “Përpjekjet e LVV-së për të bllokuar certifikimin e Listës Serbe për të marrë pjesë në zgjedhjet e Kosovës janë dritëshkurtra dhe përçarëse”.
E Kurti, duke tentuar të shmang përgjegjësinë si kryetar i LVV-së, kur u pyet për këto reagime, tha se “unë jam kryeministër” ndërsa sipas tij çështja është mes Ambasadës dhe KQZ-së.
“Ajo është çështje e Ambasadës Amerikane, është çështje e KQZ-së, unë jam kryeministër i Republikës së Kosovës”, tha ai sipas EkonomiaOnline, derisa po merrte pjesë në vendosjen e gurthemelit të stadiumit në Podujevë.
KQZ-ja të mërkurën refuzoi certifikimin e listës së kandidatëve për deputetë të LS-së, pasi dy anëtarët e LVV-së votuan kundër, kurse gjashtë të tjerë abstenuan në votim.
Demokracia në Veprim (DnV) ka reaguar në lidhje me vendimin për moscertifikim e Listës Serbe duke shprehur shqetësimin duke thënë se ky nuk është rasti i parë që KQZ devijon nga praktikat e mëparshme dhe nga vendimet e PZAP-së dhe Gjykatës Supreme. /Klankosova.tv
