Raphinha është në rrezik të mungojë në El Clasico ndaj Real Madridit këtë muaj, pasi rikuperimi i tij nga një dëmtim në muskujt e pasëm të kofshës po zgjat më shumë se sa ishte parashikuar fillimisht.
Braziliani u dëmtua në fitoren ndaj Real Oviedo tre javë më parë dhe u raportua se do të mungonte për 2-3 javë, por sipas “Sport”, ai ende nuk është rikuperuar plotësisht dhe do të mungojë në ndeshjen kundër Gironës këtë fundjavë.
Duke qenë se ndeshja ndaj Olympiacos në Ligën e Kampionëve zhvillohet vetëm tre ditë pas derbit katalanas, ka shumë gjasa që Raphinha të mos jetë gati as për atë sfidë.
Vendimi përfundimtar do të merret nga stafi mjekësor pas fundjavës, por për momentin situata nuk duket optimiste. Kjo do të thotë se nëse rikthehet për El Clasico, ai do të hyjë në ndeshjen më të rëndësishme të sezonit pa asnjë minutë të luajtur për gati një muaj.
Barcelona ka nevojë për kthimin e tij, pasi mungesa e Raphinhas është ndjerë ndjeshëm, pavarësisht formës së mirë që ka treguar Marcus Rashford kohët e fundit.
Flick po shqyrton mundësinë që Rashford të luajë si qendërsulmues, në mënyrë që të bashkojë në fushë lojtarët më të rrezikshëm ofensivë, përfshirë edhe Raphinhan, nëse ai rikuperohet.
Gjithsesi, klubi nuk dëshiron të rrezikojë me një rikthim të nxituar që mund të shkaktojë një dëmtim më të rëndë. Raphinha sezonin e kaluar ka qenë vendimtar ndaj Real Madridit, duke shënuar pesë gola në katër El Clasico, por rrezikon ta humbasë këtë përballje për shkak të problemeve fizike.
Rikthimi i tij mbetet në pikëpyetje, dhe gjithçka do të varet nga ecuria e rikuperimit në ditët në vijim. /Telegrafi/