Ish-ylli italian i futbollit, Antonio Cassano e ka kritikuar sërish sulmuesi anësor të Milanit, Rafael Leaon, i cili nuk ia mbush aspak syrin me paraqitjet e tij.
Cassano vazhdon të mendoj se Leao nuk është një fenomen, teksa e ka krahasuar me Riccardo Orsolinin, i cili sipas tij është më i mirë.
“Disa njerëz mund të mendojnë se kam një problem me këtë djalë. Nuk e njoh, nuk kam interes ta takoj, nuk më intereson. E dua shumë futbollin dhe kam pasur nderin e madh të luaj me disa lojtarë fenomenalë”, ka thënë fillimisht Cassano për Viva El Futbol.
“Kur shoh një djalë që nuk mund të gjuajë as me këmbën e djathtë dhe as me të majtën, njerëzit mendojnë se po e ngacmoj – por ky është realiteti. Ai nuk di të luajë me shpinë nga porta, nuk e kupton futbollin dhe nuk mund ta godasë topin siç duhet me asnjërën këmbë. Ai ka shpejtësi – e shtyn topin përpara dhe vrapon, kjo është ajo që mund të bëjë”.
“Ajo që më shqetëson është se ai beson se është një fenomen. Por kjo nuk është faji i tij – është faji i Milanit që e paguan 8 milionë euro. Nëse do të fitonte 1 ose 1.5 milionë euro, do ta gjykoja si çdo lojtar tjetër”.
“Nëse krahasoni performancat e Leaos me ato të Orsolinit gjatë katër ose pesë viteve të fundit, e vërteta është se Orsolini mund të jetë ai që fiton 8 milionë euro, dhe Leao nuk do të vlente as dy. Ky është një fakt”.
“Nuk jam i çmendur pas Orsolinit, por këto janë fakte. Ka të bëjë me performancën dhe qëndrueshmërinë – jo vetëm me golat dhe asistimet. Dhe të mos harrojmë, njëri luan për Bolognën, ndërsa tjetri luan për Milanin përkrah lojtarëve të klasit të lartë”, përfundoi ish-sulmuesi i Italisë. /Telegrafi/