Presidenti Donald Trump i përshkallëzoi kërcënimet e tij kundër Kolumbisë, duke u thënë gazetarëve se presidenti kolumbian Gustavo Petro është “i radhës” në fushatën rajonale të Shtëpisë së Bardhë kundër trafikimit të drogës.
Ndërsa fillimisht, Trump u tha gazetarëve se “nuk kam menduar shumë për” Petron, komentet e tij shpejt u shndërruan në paralajmërime ndaj udhëheqësit kolumbian.
“Kolumbia po prodhon shumë drogë”, tha Trump, shkruan Politico.
“Kështu që më mirë të bëjë sikur nuk do të jetë i radhës. Ai do të jetë i radhës së shpejti. Shpresoj se po dëgjon, ai do të jetë i radhës”, tha presidenti amerikan.
Komentet e tij shënojnë një përshkallëzim të mprehtë të kërcënimeve të tij kundër udhëheqësit kolumbian.
Në një bisedë me POLITICO në fillim të kësaj jave, presidenti amerikan foli për zgjerimin e operacionit të tij ushtarak kundër trafikimit të drogës – i cili deri më tani është përqendruar në Venezuelë – në Meksikë dhe Kolumbi.
Trump ka mbikëqyrur një sërë sulmesh kundër anijeve të dyshuara për drogë në Karaibe dhe Oqeanin Paqësor që nga shtatori dhe ka nisur një grumbullim masiv të fuqisë ushtarake në brigjet e Venezuelës në një përpjekje për të ushtruar presion mbi presidentin e vendit, Nicolas Maduro, që të largohet nga detyra.
Tensionet midis Trumpit dhe Petros u përshkallëzuan këtë vjeshtë mes fushatës agresive të SHBA-së kundër trafikimit të drogës në rajon.
Administrata Trump e çertifikoi Kolumbinë si partner në kontrollin e drogës dhe ia revokoi vizën Petros në shtator, duke shkurtuar ndihmën për vendin dhe duke e kritikuar udhëheqësin e saj si një “trafikant ilegal droge”. /Telegrafi/
