Nesër do të bëhet vendosja e gurthemelit të memorialit kushtuar zyrtarëve policorë që kanë dhënë jetën në krye të detyrës. Kjo në 18 vjetorin e vrasjes së zyrtarit policor Triumf Riza.
Policia e Kosovës njofton se nesër duke filluar nga ora 10:00, në lagjen “Dardania” të Prishtinës, tek vendi ku ka rënë Triumf Riza, do të mbahet ceremonia e homazhit pranë pllakës përkujtimore kushtuar atij.
“Gjatë kësaj ceremonie po ashtu do të bëhet edhe vendosja e gurthemelit të memorialit i cili do të ndërtohet si simbol nderimi dhe kujtimi për veprën e tij dhe për sakrificën e të gjithë zyrtarëve policorë që kanë dhënë jetën në krye të detyrës”, thuhet në njoftimin e policisë.
Në ceremoni pritet të marrin pjesë kryeministri në detyrë Albin Kurti, ministri i Punëve të Brendshme në detyrë, Xhelal Sveçla, drejtori i Përgjithshëm i Policisë së Kosovës kolonel Gazmend Hoxha, si dhe eprorë të lartë të Policisë së Kosovës.
Të akuzuar për vrasjen e Triumf Rizës janë Ilir Abdullahu, në bashkëkryerje me të dënuarit Arben Berisha e Fitim Avdiu, dhe të pandehurit Enver Sekiraqa dhe Rrahim Abdullahu, akuzohen se kanë kryer veprën penale të “Vrasjes së rëndë’, nga neni 147, paragrafi 1, nënparagrafët 3 dhe 9, lidhur me nenin 23 të Kodit të Përkohshëm Penal të Kosovës.
Ilir Abdullahu, i njohur me nofkën “Liza”, u arrestua më 16 korrik 2023, pasi për vite me radhë kërkohej si i dyshuar për vrasjen e Triumf Rizës.
Për Triumf Rizën është duke u gjykuar edhe Enver Sekiraqa, i akuzuar për nxitje të vrasjes së policit. Sekiraqa më 3 maj 2024 u dënua me 25 vjet burgim. I njëjti gjendet në arrati.
The post 18 vjet nga vrasja e Triumf Rizës, nesër nis ndërtimi i memorialit për policët e rënë në detyrë appeared first on Klan Kosova.