Pas shpalljes së aktgjykimit ndaj Millosh Pleskoviqit dhe dënimit të tij me 15 vjet burgim për krime lufte të kryera në Prizren, avokati i viktimave, Gent Gjini, e ka konsideruar vendimin si të papërshtatshëm dhe të pamjaftueshëm në raport me krimet e kryera.
“Ky dënim është shumë pak në raport me masakrat. Zonjës ia ka masakruar dy fëmijë binjakë, ua ka prerë gjymtyrët. Këto janë fakte. Gjykata e ka dënuar shumë pak, duke u bazuar në ligjet e Jugosllavisë,” deklaroi Gjini, raporton EO, transmeton Klankosova.tv.
Ai theksoi se Pleskoviq ka qenë pjesë e “Beretave të Kuqe”, formacion paraushtarak serb i udhëhequr nga krimineli i njohur Arkan.
“Për herë të parë po gjykohet një anëtar i Arkanoviqëve dhe i Beretave të Kuqe,” shtoi avokati nga Prizreni.
Sipas aktakuzës, më 1 shtator 1998, në afërsi të Prizrenit, Millosh Pleskoviq, duke vepruar si pjesë e një grupi të armatosur prej 7-8 personash të nacionalitetit serb, kishte ndaluar një grup shqiptarësh civilë që po udhëtonin drejt malit. Viktimat – R.D., B.D. dhe F.B. – së bashku me të mbijetuarit Fevzi Cana, Xhenger Cana dhe Bashkim Kastrati – ishin ndaluar dhe fyer me fjalë në gjuhën serbe. Në mesin e sulmuesve, sipas dëshmive, ishte identifikuar edhe i akuzuari Pleskoviq.
The post 15 vjet burg Pleskoviqit, avokati: Ky dënim është shumë pak në raport me masakrat appeared first on Klan Kosova.
