Letra e vendosur nga Inspektorati Sanitar, me sa duket nuk ia mbushi syrin pronarit të lokalit. Andaj, për t’iu treguar mysafirëve të tij se lokali ishte i mbyllur, i njëjti vendosi një kuti me pije alkoolike para hyrjes.
Vendimi të cilin mund ta shihni në videon e mëposhtme, iu vendos edhe dy lokaleve të tjera në të njëjtën rrugë.
Këto veprimtari kishin penguar edhe Kishën Katolike në kryerjen e ritualeve fetare, pasi kafenetë ndodheshin përballë objektit fetar.
Kiks Kosova ka rënë në kontakt me pronarët e lokaleve për të mësuar arsyen e inspektimit nga Inspektorati Sanitar dhe ndalimit të punës. Mirëpo, kjo nuk po i bën aspak përshtypje njërit nga pronarët të këtyre bizneseve.
I kontaktuar për herë të dytë nga Kiks Kosova, i nervozuar, ai u shpreh ndaj gazetares se nuk i intereson fare arsyeja e mbylljes. Madje, ai nuk i kurseu as kërcënimet.
Ai vazhdimisht ka përsëritur fjalinë se “asgjë e gabuar nuk është zhvilluar në lokalin e tij.”
Ndërkohë, lokali ku punonte vajza që e kishte sulmuar ekipin e Kiks Kosovës në fillim të gushtit, gjatë raportimit për këtë çështje, nuk u mbyll nga inspektorati. Çuditërisht, pronari i asaj kafeneje ia kishte vënë vetë “drynin” lokalit. Për këtë, ai ka fajësuar emisionin Kiks Kosova.
Në një bisedë telefonike me gazetaren, i pyetur nëse Inspektorati ka ndërhyrë edhe në lokalin e tij, është shprehur se kinse është detyruar ta mbyllë sepse emisioni “ua ka dëmtuar imazhin”.
I tensionuar, ai u përgjigj se këtë lokal nuk mund ta hapë më, pasi “i ka shkuar fytyra”. Madje, për këtë arsye, ka vendosur të ndjekë edhe rrugë ligjore kundër emisionit.
Kiks Kosova ka provuar të marrë edhe versionin e pronarëve të lokaleve të tjera të mbyllura, mirëpo kjo ka qenë e pamundur.
Për shkak të këtyre lokaleve, Kisha Katolike në Ferizaj, disa muaj më parë ishte detyruar të ndërtojë një mur të lartë, me qëllim që t’i pengonte ato në zhvillimin e ritualeve fetare.
Ndiqni videon:
The post “Ma keni marrë fytyrën”, lajmërohet pronari i kafenesë së Ferizajt (VIDEO) appeared first on Klan Kosova.